BUKO PALABOK, MASUSTANSIYANG – MASUSTANSIYA (RECIPE/HEALTH)

 

Sa init ng panahon ngayon, ano ba ang mga alternatibong paraan upang hindi tayo ma-dehydrate o maubusan ng tubig sa katawan at magpapapresko sa atin ngayong usong-uso ang heat stroke? Unang – una sa listahan ang buko, hindi lang pampapresko, matutulungan pa tayong linisin ang ating bato at maiwasan ang pagkakaroon ng UTI.

Ang buko ay nagtataglay ng iba’t – ibang bitamina tulad na lamang ng Vitamin C, B6, Calcium, Iron at Magnesium. May iba’t – ibang gamit din ito at maituturing na walang sayang ang puno ng buko, puwedeng gawing oil, gatas, pang salad, lotion, sabon, shampoo, at kung ano-ano pa.

Ginagamit na rin itong pangunahing sangkap sa iba’t – ibang klase ng lutuin, tulad na lamang sa Spaghetti, Sinigang at maging sa Palabok.

Ang pangunahing sangkap nito ay ang ginayat na laman ng buko, ito na rin ang magsisilbing noodles ng palabok, ang ilang mga sangkap ay ang atsuete, bawang, sibuyas, mantika, asin, paminta, kalamansi, hiniwang baboy, dinurog na tinapa (tinapa flakes), nilagang itlog at chicharon.

PARAAN NG PAGLUTO

                Igisa ang sibuyas, bawang at atsuete sa mainit na mantika, ilagay din ang durog na tinapa at baboy at hintayin itong pumula. Habang naggigisa, ilaga ang itlog (Hard-boiled egg), pagkagisa, lagyan ng tubig o sabaw, lagyan na rin ng asin at paminta at hintaying lumapot ang sabaw nito.

                Pagkaluto, ilagay ang sauce sa ibabaw ng ginayat na buko at saka ito lagyan ng toppings na chicharon at sliced na nilagang itlog at pigaan ito ng kalamansi sa ibabaw.

                Napakasarap na, napakasustansiya pa, tunay na kakaiba ang lutuing ito kaya naman subukan na at mapatalon sa kakaibang lasa at sarap ng buko palabok.